1976an hasi nintzen Katalogo hau osatzen. 1936an Francoren altxamenduak ekarri zuen etenalditik honako fitxa bibliografikoak landu nahi nituen, emaitza bibliografikoa soziologikoki aztertu ahal izateko. Euskal Idazleak Gaur (1977) liburuan eman nuen lehen liburu bilduma. Geroztik, urtero-urtero Jakin aldizkariko orrietan eman ditut urteko fitxa bibliografikoak, azterketa batez lagunduta. Gaur arte.
Artean, 1993an, gorpuzten da proiektua. Gipuzkoako Foru Aldundiko Kultura Departamentuak aspalditik nekarren asmoa betetzeko aukera eman zidan, alegia, hogeigarren mende osoko liburuen datu-basea jendearen eskura uztea modu eraginkor eta erraz batean. Harrez gero Gipuzkoako Foru Aldundiko Kultura Departamenduak lagundu dit ekonomikoki langintza honetan.
Horrela, 1993an argitaratu zen XX. Mendeko Euskal Liburuen Katalogoa (1900-1992) liburu mardula. Hiru liburuki gehiago izan dira segidan, hogeigarren mendeari dagozkion ehun urteak osatu arte. Lau liburutan, hortaz, hogeigarren mendeko liburuak oro bildu dira paperean. Hemen bildu ditugun berak.
Katalogo hau ez dago guztiz neure eskuz egina. Zordun natzaie, batez ere gerraurrekoari dagokionez, EEBS (Egungo Euskararen Bilketa-lan Sistematikoa) proiekturako UZEIk landuriko inbentarioari eta Jon Bilbaoren Eusko Bibliographiari. Liburu biziari dagokionez euskal argitaletxeek ere asko lagundu naute. Koldo Mitxelenan eta Donostiako Udal Liburutegian ere laguntza paregabea aurkitu dut.
Katalogo honek, bai helburuan, bai diseinuan, praktikoa eta funtzionala izan nahi du. Irizpide nagusi honen argitan hartu dira hainbat erabaki, grafia kontutan bereziki.

Joan Mari Torrealdai